بوابة النويدرات البوابة الإعلامية لقرية النويدرات
النويدرات – محمد الجدحفصي
استضاف برنامج «الناصية» الذي يبث عبر «الوسط أون لاين» أحد وجهاء قرية النويدرات ليتحدث في حوار عن القرية وما تتميز به وعن الأعمال التي يعملونها قديما وعن أمور أخرى تناولها الحوار.
أين كان يعمل النويدريون قديما؟
– كنوا يعملون في صناعة المديد ويدخلون الغوص والبحر، يبيعون حشيش…
من كان أشهر واحد يصنع المديد في النويدرات؟
– أشهر واحد يصنع المديد في النويدرات، حجي مكي من الصنانيع وإبراهيم… حجي علي المشعل، وبيت حسن مكي وبيت علي بن عبدالله حجي علي ابو علي بن عبدالله المؤذن في المسجد وهو من الكبارية في صناعة المديد.
كيف يتم تعلم القران في الديرة؟
– كان يتم تعلم وتعليم القرآن سابقا في النويدرات عن طريق المطوع، مثلا أنا تعلمت عند واحد اسمه أحمد بن شيخ أحمد أبو الخضر، تعلمن عنده قليلا ثم طلعت ورحت عند شيخ محمد بن شيخ علي، اخوه من أمه، وبعد وفاة الشيخ محمد جيت عند حسن بن حجي عبدالله أبو عبدا لله بن حسن، وتعلمت عنده وختمت عنده.
وحجي مكي…
– حجي مكي علم أولادي، محمد وزيد.
والمطوع الأول نفس الطريقة الحين ولا أتغيرت، يعني أتروحون تقرون السور من بدايتها، طريقة تعليم القران نفس أول؟
– لا… في الأول يؤتى بلوح وطين ويصنع قلم من الخوص ويكتب في اللوح ألف باء تاء ثاء… اي لابد أولا من تعلم أبجد والف باء وقل اعوذ برب الناس، وقل أعوذ برب الفلق، الحمد.
وانت كم أخذت لما خلصت القرآن، أخذت مدة واجد لو…
– يمكن سنتين ونصف أو 3 سنوات… يعني مثلا بسم الله، يعلمنا حسن بن حجي عبدالله هكذا، بسم الله… باء سين ميم.
هل كانت توجد عيون في النويدرات؟
– نعم.
وش أساميهم؟
– اساميهم… النعيم العودة وعقبها تجي الحرامية.
ليش امسمينها جدي؟
– الحرامية مأخوذة من ماء العين، يأتي بعدها الجوجب وبعد الجوجب القصة وعقب القصة عندنا جوجبين اثنين خاصين للنسوان، الرجال يسبحون في الجوجب وعين العودة وعندنا الصودات، وهذا يسقون منه النسوان وفي سيبان اثنين شمال وجنوب.
هل تذكر العرس في السابق كيف شكله عندكم؟ طريقة الزواج الزفة؟
– عندما تقدمت لطلب يد زوجتي أرسلت بن خاتم، فقال لهم إن هذا حج علي يبغي يناسبكم فماذا تقولون، قالو خله يجي ونتعادل على المهر.
والمهر كم كان الأول؟
– كان خمسا وعشرين ربية، أي دينارين ونصف، خمسة دنانير، أنا خمسة دنانير، خمسين ربية.
ألا توضع زينة على بيت المعرس والعروس؟
– لا، لا، ما ميش زينة.
وتالي ايسون خطوبة؟
– لا، لا ما في خطوبة، من يتعادلون يؤتى بالشيخ، ويأتي واحد من المعامير ولا يوسف بن حجي حسين ياخذ وكالة من عندي ويروح إلى المرأة وياخذ من عندها الوكالة… ويجيب لك يوم ثاني الورقة.
بس ما يسوون زفة ولا شي؟
– بلا ايسوون.
يسوون عشاء؟
– ايسوون «غدا» ويقرأون مولد من الصبح إلى المغرب وتالي يتعشون الديرة، كل الديرة نعزمهم على غدا وعشاء، وبعد ما يتعشون يقرأون مولد ويتلبس المعرس ويطلعون وراه، (واه صلي وسلم عليك يا رسول الله محمد) … ويوصلونه إلى بيت العروس.
إذا عقد عليها مثلا وخلص اصير على طول يجلس وياها؟
– لا تشوفه ولا يشوفها، ولا تطلع من بيتها، انا اروح تلاقيني أمها وهي وياها وانا استحي ويتباعدون ما يشوفها بس اشوفها بس اول ليلة الخطوبة، عن خاطره ولا يشوفها الا ليلة العرس، سنة سنتين شهر شهرين ما يشوفها الا ليلة العرس، وفي ليلة العرس لابسة غشوايتها، يقول لها المعرس بطلي وجهك، فتقول: أول الفلوس، كم الفلوس خذت 20 روبية 10 روبيات وتالي لين عطاها البيزات كشفت عن وجهها، اجي وحدة الداية اتحط ارجولها والمعرس يحط رجوله فوقها وتغسل وترمي للداية 5 ربيات 10 ربيات داخل الصحن وتاخذه الداية كأنه للداية.
وشلون طريقة الحنة؟
– ايجي واحد من الصبح للحناء وهي بعد تجيها وحدة يحنونها من الصبح، وللظهر ايحنونها والعصر ايحنونها.
بس ما تسافرون نفس الحين؟
– سفر ما في ما نطلع.
الحج أو …
– الحج اشوية من الخمسينات ولكن قبل الخمسينات حجي محمد بن سرحان راح الحج في الاربعينات حجي علي بن عبدالله في الاربعينات ناس واجد في الاربعينات راحوا الحج، لكن الحج صعوبة يطلع من يفطر أو قبل ما يفطر (قبل عيد الفطر أو بعده)، وتالي يمضي 6 أشهر ما جي إلا ويا محرم.
6 أشهر يقعد هناك؟
– ياخذ رجب وشعبان ورمضان والفطر (شوال) وثاني فطر) والحج ويجي في أيام عاشور.
6 أشهر لين ما يوصل الحج.
– لأنهم يسافرون على نوق ، أيوصلون الخبر ويجون اصحاب النوق يا خدون الحجاج…
انت رحت بنوق؟
– لا انا رحت في لاري 7 أيام من الخبر إلى أن وصلنا المدينة.
انت رحت مدرسة لو مارحت؟
– الحاج علي بودهوم: أنا رحت المدرسة في سترة 3 أيام ما جازت لي، فتحوا المعامير ورحت أسجل قالوا انتهى التسجيل، رحت وضميت الشغل… بعد ذلك فنشت، لأن الوالد راح البحر ما وياه أحد هذا وياه حجي أحمد… وياه ماجد هؤلاء راحوا ضموا.
ديك الفترة كم كان عمرك؟
– 14 سنة ، 15 سنة.
يوم اشتغلت في بابكو كم عمرك؟
– عمري ما يقارب 16أو 17 عاما.
شنو وظيفتك في بابكو؟
– تالي أنا فنشت… وما شفت لا وقعة درام رايح ودرام جاي فقلت انا وش ليي فنشت بعد… يوم واحد ولا رجعت رحت عوالي وودونا الفنري يوم رحت الفنري رحت اشتغلت في مكان وطليت اتعلم 1، 3، 2 بالانجليزي وخلوني «غيجر»، اجيب قياسات التوانكي، وبعد فنشت، ودوني مكان آخر بعد 6 شهور ودوني مدرسة الزلاق وتعلمت، طلعت انا الخامس على الطلبة، وبعد رديت عودت الشغل وشتغلت وبقيت سنتين ودوني المدرسة عوالي «استيج تو» في شهرين، 6 شهور المدرسة في شهرين عطوني «استيج اثري» هذا لما انا خلصت من «استيج اثري» جابوني رشحوني إلى مكان اسمونه ياخدونه «استيج فور» في لندن «استيج فور» طاح واحد من النشابة عبدالمجيد النشابة طاح اتعور قالو لي انت… ودو واحد من المعامير اسمه حجي طاهر ابن حمود مكاني اني ما رحت لندن لكني بقيت اشتغل إلى لين مثلا عطوني تالي ترقية اشوية صرت… وبعد … رحت «فاير مان» معناه مراقب النيران وبعد تالي رقوني عطوني المكان ثاني اتعلمها علشان اصير ابريتر وبعد الابريتر …… وترشحت إلى «الابريتر» بس ما بقت لي شي قالو لي ما بقى الا سنة واحدة ما نعطيك «الابريتر» لان صرت «كنترول مان»……. انا صرت في حجرة المراقبة…. من «دي ون» إلى «غرس 8»…
وظيفتك نفس حجي علي المطوع؟
– لا علي مطوع «اترين» مالي، هذا علمته انا سنتين وياي اعلمه انا.
تذكر الصحف وياكم اول ولا ما تذكر؟
– لا ما في البحرين صحف، تالي صار، لكن صحيفة مالت بابكو.
انا اعني في الاربعينات ما في صحيفة الاضواء؟
– لا هذي من بعد الخمسينات ابتدأت في الستينات، وهذه الصحيفة المواقف ابتدأت في الستينات، المواقف الي صار عبدالله المدني هذي بدأ فيها من نهاية الخمسينات في الستينات.
وكنت تتابعها؟
– كنت اتابعها، مشترك وياها، تالي اخذها سيد مصطفى القصاب، وتالي بعد اخذها مصطفى القصاب عندي انا معرفة وياه من جهة المدرسة في بابكو ورديت اروح وياه.
الحين تتابع الصحف أم لا؟
– لا، اتابع جرايد، هذي عندنا صحيفة مالت بابكو امس.
أقصد الصحف اليومية ؟
– اليومية، أتابع أحيانا إذا جاب حسن.
وش عنك حجي احمد قول؟
– الله يطول عمرك الأول إحنا كنا نروح البندر ويا الوالد الله يرحمه ونجيب سمك، وبعدين اطرشنا المنامة انبيع سمك، كانت المنامة. ومدينة عيسى ما ميش انبيع السمك في المنامة سوق المركزي ايسمونه سوق السمك الاول ما ميش الا هي القديمة.
لحقت على الحمالية؟
– اي الحمالي فوق التايرات الحطب، يحطون المراحل فوقه اوديهم داخل، قليل أول السيارات ما ميش، كم واحد.
من متى تشرب سجائر؟
– انا من الاربعينات.
وشلون شربت سجائر؟
– أنا شربت سجائر…
منو الي حدك؟
– لمريكي يومية يجيب ليي، انا اشتغلت في «ويمبي» الأمريكي يجيب لي قوطي سجائر، يعطيني قوطي تعلمت على السجائر خلاص، ما قدر اقطع السجائر.
الله يحفظه ويطول في عمرة
تحتاجون تسوون وياه لقاء لان لقاء الوسط ما اخذ منه معلومات كثيرة