من برنامج الناصية … لقاء مع المرحوم الحاج إبراهيم قمبر

أجرت صحيفة الوسط في عددها رقم 2857 (السبت 03 يوليو 2010م الموافق 20 رجب 1431هـ) خلال برنامج «الناصية» الذي يبث على «الوسط أون لاين» لقاءًا مع المرحوم الحاج إبراهيم قبمر، المتوفى يوم الجمعة الموافق لتاريخ 13 يوليو 2012م، وقد ورد في السجلات الرسمية لتاريخ ميلاد المرحوم أنه من مواليد العام 1923، فيما يذكر بعض أهالي القرية بأنه ولد قبل ذلك.

اللقاء…

أجرى اللقاء: محمد الجدحفصي

قال المعمر الحاج إبراهيم قمبر إن على الناس أن تأكل المأكولات الطازجة وخصوصا السمك، مشيراً إلى وجود آيات تدل على الأكل الطري بعد استخراجه من البحر، وخلال حديثه إلى برنامج «الناصية» الذي يبث على «الوسط أون لاين» اليوم (السبت)، مشددا على أن التوقيت المحدد يوميا في الأكل له دور كبير في صحة الإنسان.

الحاج إبراهيم قمبر، نرحب بك في برنامج «الناصية» الذي يبث على «الوسط أون لاين»، وفرصة طيبة أن نسولف وياك؛ بس شكلك مشغول بقراءة الصحف والمجلات…

– استمل منهم، بس اللي ما استمل منه القرآن، يومياً أقراه ما أستمل، بس الجرايد وغير الجرايد يعني تقرأ مرة وحدة تستمل، بس القرآن لا ما أستمل.

انزين سنة جم متزوج أنت؟

– والله من الخمسينات أو الأربعينات، يوم أتزوج أنا عمري 17 سنة.

والحين جم عمرك؟

– عمري الله يعلم به، ما في شهادات.

انزين كنت أنت زراع لو بحار؟

– والله كنت بحار، واختلطنا البحار بالزراع.

شلون؟

– يعني البداية أخذت النخيل وعمرتها وسويت فيها زراعة، يعني ملفوف وغرنابيط، جنوب مناك صوب السوق الجديدة.

وعندكم حر الأول نفس الحين؟

– أزيد من الحر هذا، حر ما تقدر تطلع من زود قوة الشمس، بره إذا رأسك مكشوف يعني ما تقدر تتأخر واجد، بس الأول ماي موجود، ورانا وقدامنا ماي، هذه نعمة الله سلبها من عندنا. لو كان الماي موجود مثل الأول، اول كان داخل بيتنا ماي من مجاري مال النخيل. عبارة عن ساب يروح إلى آخر شيء في المجرى.

انزين الأول تعرف أنواع الرطب هذا خنيزي هذا خلاص؟

– اي طبعاً، نعرف الرطب المبشر، الخضيري، خلاصة، خصبة فدية اللي ما تعرفونها انتون.

ما نعرفها هذه احنا، فيها منها الحين لو ما في؟

– يمكن فيه، لكن رطبها مو زين.

ليش؟

– لأنه، الله يسلمك نوعاً ما يجلود شوي، يعني مو مديح. خصبة الفدية، السلمية، الحلاّوة، الحمري، بريسمي، احنا عندنا نخيل…

هذه كلها تطلع في الصيف؟

– مو في الصيف، هالأيام…

ايه هذه الأيام صيف؟

– لا، احنا ما نقول صيف، نقول قيظ، نقول صيف متى؟ الصيف عندنا احنا، يعني على اصطلاحنا احنا في الديرة، آخر الوقت من الشتاء نسميه صيف.

انزين وتالي تركت الزراعة؟

– ما تركت الزراعة أنا، واصلت الزراعة والبحر، أجي من الشغل واطلع اروح البحر بعد، بعدين بعت عدة البحر.

تطلع بشنو؟ ببانوش؟

– ايه ببانوش، وبشراع ومجاديف…

من وينه لك؟

– ايه اشتريته من واحد من أهل سترة، وتالي بعته لأني لوحدي اروح.

تروح لوينه؟ إلى أي منطقة؟

– لصوب الجنوبي، منطقة ما تعرفها.

بر شتية؟

– لا، بر شتية شمال، احنا نسميه معين والزغبة وأسامي مال صوبنا احنا.

وتدش بحضور يعني؟

– لا، لا بقراقير، وأعمل أنا قراقير، أنا اللي أصنعهم.

ويش أنواع السمك اللي تصيده؟

– هامور، جنمة، فسكرة، شحدود، شعري نصيد.

انزين في اليوم الواحد تصيد أي قد؟

– والله عاد في اليوم الواحد ما أعلم، يوم تحصل لك 4 كيلو، 5 كيلو، على العدة، على جملة القراقير، إذا كان عدد القراقير مثلاً 30 لا، أنا الأول أروح ويا اخوي، اخوي كان نوخذة أروح وياه، عندنا 36 حيزة، حيز عاد مو قرقور. القرقور غير والحيزة غير. الحيزة تسوي لها بطن، والقرقور لا له صفقتين تشبكه بسيم أو بحبال، يعني تسوي له طوق مال سيم وتعمل على الطوق وتعمل له صفقة وحدة وبعدين تخليها وتسوي الصفقة الثانية.

انزين وتالي هديت البحر ورحت بابكو؟

– لا، حتى أيام بابكو كنت أروح البحر بعد.

هي سنة جم رحت بابكو؟

– في الستينات أو الخمسينات.

يعني كان عمرك 20؟

– أول ما اشتغلت في بابكو كنت في الحفيز مال المعاشات، يعني على ما نقول فراش، انظف الطاولات وهذا، تالي جا الانجليزي بعد وعطاني مفاتيح مال حجرته، واشتغلت. تالي قلت لا ببدل، هذه الشغلة الحين ما احصل منها فايدة، قمت حاولت وحاولت وبدلت، الأول كان عندهم جم يعطون الجماعة اللي يشتغلون داخل الفينري على 10 آنات، والعشر آنات نص روبية أو 8 بيزات.

ما تجيب ليها شي يعني؟

– لا، لا الحين لا، بس اول تجيب. الأول الروبية تجزي ليها عايلة. الاول جيس العيش بسبع روبيات. لكن مو البسمتي مال باكستان عيش على ما نقول حلوايوه، عيش عادي عبارة. الجيس بست وسبع اول، تالي جا بسمتي وما ادري ويشو وغلّوه، والعنبر وغلّوه.

جم سنة اشتغلت في بابكو؟

– 23 سنة.

وهدَّيتهم أو طلعت تقاعد؟

– لا، لا طلعت تقاعد. إلى الحين يعطوني راتب.

بس يقولون جوا ليك جم مرة يجيكون إذا كنت موجود أو مو موجود؟

– ايه، لا لا، يجيبون ليك ورقة، أنا من زمان طالع، وكله معاشات يعطونا معاشات، ويقولون هذا مو ميت ولا شي حتى نفتك منه!

انزين، يبغون يتأكدون هذا موجود أو لا؟

– ايه، يتأكدون يعطونا ورقة، كل سنة يجيبون لينا ورقة، اكتب رقم مال التقاعد، واكتب اسمك، واكتب غريت ما ادري ويشو، اعطي هذا الولد عبدالأمير يمليها ويوديها المكتب.

ها، يعني مو مصدقين ان انت عايش؟

– لا، عندنا بعد واحد من الديرة يشتغل في بابكو في الحفيز يشتغل، يسألونه بعد، هذا باقي لو مو باقي. بعدي باقي أنا، ولو يبغوني اروح ليهم هناك، لو يخلوني ادش دشيت ليهم بعد.

ويش تاكل من أكل؟ متى تتغذى؟ متى تتعشى؟

– الغداء الساعة 11 وربع إذا زاد عن 11 وربع صار وصل إلى النص الثاني من الساعة إلا ربع يعني أعتبره قضاء قربة لله.

عن الأكل؟

– أيه على الأكل لأن طاف تايمه هو 11 وربع يعني هذا هو يومية 11 وربع 11 وثلث إذا صار وصل النص أو زاد عن النص أنويه قضاء.

انزين ويش تاكل من أكل؟

– آكل لحم سمك مطبوخ أي شيء موجود في البيت آكله.

بس أهم شيء طازج يعني توه طالع؟

– أيه الطازج السمك خب طازج اللحم إذا جابوه طازج.

انزين والعشاء؟

– العشاء ما ليه تيم، لا، هذا العشاء أنا ما أعتني به يعني مثل الغداء. أهم شيء الغداء 11 وربع 11 وثلث إذا زايد عن النص خلاص.

وتنام من وقت؟ اتنام متى؟

– بالليل ما ليي تيم بالنوم لا يعني الساعة 11 أروح على المنام ما يجيني نوم مثلاً، يعني العشاء ما ليه تيم أي ساعة أشتهيت أكل آكل.

الريوق؟

– الريوق ليه تيم بعد الصبح، تقريباً عقب الساعة ست الساعة، ست ونصف إلى الساعة 7 أهم شيء الغداء أهم شيء 11 وربع 11 وثلث إذا صار 11 ونصف أنوي خلاص قضاءً قربة إلى الله.

أنزين ورحت المستشفى من قبل لو ما رحت؟

– رحت المستشفى المستشفيات.

تاخذ أدويتهم لو ما تاخذها؟

– أخذها استعمل مال القلب. عندي بعض العضلات يقولون ضعيفة، استعمل مال القلب.

انزين تذكر متى جابوا الكهرباء في النويدارت؟

– الكهرباء الله يسلمك يمكن في الخمسينات أو الستينات.

أول بيت جابوه تذكره أو لا؟

– لا. أول بيت كلنا حاربنا على الكهرباء، أنا سلكت بيتي قبل ما يحطون كهرباء، واللي سلكه واحد من عائلة الحاج أحمد بن علي أو عبدالرحمن الحايجي ما أعرفه.

انزين السنة اللي كنت أتزوجت فيها منهوا حاكم البحرين تذكره؟

– ايه أذكره كان الشيخ حمد.

كم حاكم لحقت عليه أنت الحين؟

– الشيخ حمد والشيخ عيسى والشيخ سلمان والشيخ عيسى والحين اللي هو شيخ حمد.

لو قلنا لك يا حجي إبراهيم نصايحك للناس للشباب ويش تأكلون؟ اشلون تشربون؟

– أقول ليهم ما ياكلون أكلي، ما يتغذون على تيمي، أنا أولادي ما يتغذون على تيمي.

لا بس أحنا قصدنا الناس ويش أتقول لهم كلوا ويش حق أتصيرون زينين؟

– أنا ما أقول شيء محدد؛ أنت قبل ما تجي من أشويه أنا توي قايم من الغداء.

نبي أحنا نصايحك إلى الناس؟

– نصايحي إلى الناس إذا قلت ليهم أكلوا سمك، لأن الله ما ذكر سمك ذكره لحم «لتأكلوا منه لحماً طرياً» (النحل: 14) تقول ليهم أكلوا لحم لو السمك؛ كل واحد يشتري سمك. الأكل المتداول عندنا أحنا السمك واللحمة والدال مثلاً. هذي الأشياء المفروض ياكلها الناس.

مشكورين يا حجي إبراهيم.

– الشكر لله.