ليلة الشهادة للشاعر المرحوم الحاج عباس البربوري

طالع الى المسجد علي ليث الحريبة
وزينب تنادي حالتك يابه عجيبة

متعجبة منك الليلة وقلبي مرتاب
تطلع تعاين في السما قلي شلسباب
ما عاهدت منك جزع يا داحي الباب
قلها يبنتي يعينش الله على المصيبة

الليلة تساتعشر وانا عندي خبرها
ينضرب راسي بالصلاة واحظى بجرها
صاحت يبوية الله يكفي الناس شرها
لا تطلع الجامع بهاليلة الرهيية

ردها علي المنزل يقلها يا زجية
زينب ترا هذا الذي مقدر عليه
يمخدرة محد يفر من المنية
نادت يبوية ودمعها بخدها صبيبه

نجان عندك خبر يا نور المسلمين
تضرب على راسك يبوية وقرة العين
خلني اوقض لك خواني حسن وحسين
قلها يبنتي الليل باقي يا نجيية

ودع علي زينب وعنها لجامعه راح
وصارت بحجرتها تصك الراح بالراح
وطلعت الى خوتها ودمع العين سفاح
جاها حسن وحسين وشافوها نحيبة

قلها الحسن يا بنت فارس بدر وحنين
شمالي اشوفش والدمع يجري من لعين
بهالليل شلي صار لج يختي تطلعين
نادت ودمعتها على خدها سكيبة

ودعو زينب وطلعو كلهم سوية
سباع ونشامة ما يهابون المنية
والحسن قدام اخوته راعي الحمية
وصلو الجامع يا هلا بأنوار طيبة

وصلو الجامع صفوة الأرض وسماها
بعد النبي المصطفى وحيدر حماها
سادة شباب الجنة ومرجع هداها
وحيدر يعاين والقلب يسعر لهيبة

تذكر عقب عينه على اولاده شجاري
من سم ابو محمد الى الينذبح عاري
بعد الذبح يندفن جسمه بالبواري
وزينب عقب عينه تظل ويلي غريبة

واتجه للمحراب فارس بدر وحنين
لن هاتف ينادي الأمر لله يبو حسين
الليلة الشهادة تنالها يمشيد الدين
الله بن ملجم يخضب بدمك الشيبة

أذن واقام المرتضى وللفرض احرم
وبالركعة الأولى شطر راسه بن ملجم
فوق المصلى وقع راسه مخضب بدم
برضوان ربه فاز والهادي حبيبه