مع زوار الغريب للشاعر عبد المنعم الشايب

هالليلة نوصل كربلا ابْدمعة جريّة
وَيَّ الوديعة نِلْفي الحاير سويّه

يالكعبه الْبيها نطوف ونعتُمُر مِن
مِثْلكْ يَبُو الأكبر تِحِجْ تُربَه البريّه

لا ما نعوفك لو يِذِبْحونا الأعادي
وُلَو يِوَذرونا على حرّ الوطيّه

لو تِنْقطعْ رجلينا وِايْدَينا يغالي
نوصَلْ زَحِفْ لَكْ يا غريب الغاضريّه

هذا العمُرْ خلْ يِفْنى كلّه في خِدِمْتَكْ
شيعة وتِظِلْ دوم الْثرى اتْرابَك وفيّه

نقسم وحق راسك إلى المحشر نزوركْ
ونذكر مصابك كل صباح وكل مسيّه